Te Kura Kaupapa Maori o Harataunga
He āhuatanga ako mō te katoa
6.10 Kia puāwai tōna waiora me tōna hauora i roto i te hono tāngaengae o tōna wairua me tōna tinana.
MANA ATUA
Ka hono te tamaiti ki tōna mana atua mā te whai wheako i ngā ao o tēnā atua o tēnā atua. Kia mōhio te tamaiti ki ōna herenga ki ngā atua, ā, kia rongo hoki ia ki tōna ira atua.
MANA WHENUA
Ka hono te tamaiti ki tōna mana whenua mā te whai wheako ki te ohu i te whenua, mā te mōhio hoki ki tōna tūrangawaewae kei tōna papa kāinga nei.
He mea nui ki a mātou tā te tamaiti tūhono ki tōna whenua, ā, kia tū ia hei kaitiaki mō tōna papa kāinga nei.
MANA TANGATA
Ko te whānau, ko te hapū, ko te iwi tonu o konei ka whakahaere i ngā akoranga o te kura nei. Mā te whakawhanaungatanga a te katoa ki ngā tamariki, mā te rongo hoki a te tamaiti ki te aroha o te tangata ki a ia, ka whakaū ki roto ki a ia tōna mana tangata.
Ka tū pakari, kā tū rangatira hei raukura mō tōna whānau, hapu, iwi hoki.
MANA AOTŪROA
Ka toro atu ki ngā tūmomo ako whānui o te ao, kia kaua te tamaiti e herea ki te ao kohatu. Kia mōhio tuatahi ki ngā kōrero mō tōna whānau, hapu, iwi, heoi ka tūwhera hoki ngā kōrero mō tēnā ahurea, mō tēnā whenua me ōna tini tikanga katoa hei whakawhanake i tōna titiro ki te ao.
Te poutama hei āhuatanga whakawhanake
He pērā i te poutama i pikitia e Tānenui-ā-rangi ki te tiki i ngā kete o te wānanga, ka pēneitia te whanake a te tamaiti i roto i tōna ao. Ehara i te mea ka whanake i tōna hinengaro noaiho, engari kē ko tōna tuakiri katoa. Ka whakaaturia e te poutama ēnei wāhanga katoa o te tangata arā; wairua, tinana, hinengaro, whatumanawa.
Mā te whānau whānui te tamaiti e āwhina ki te piki i tōna poutama kia eke panuku ia ki tāna e wawatatia ai.