Te Kura Kaupapa Maori o Harataunga
Ma te Kura Papa Kainga te Tamaiti Hei Whakatipu
Mehemea he uaratanga enei mo auna tamariki ... Kia mau, kia noho whakaaraara, noho koi te hinengaro o te tamaiti ki nga matau katoa hei arahi i a ia i roto i te ao hou; Kia noho ohooho tona auahatanga i roto i nga mahi waihanga o tona ao; Kia noho tuwhera tona ngakau ki te hari, ki te koa, ki te aroha, ara, kia ngakau nui, kia ngakau mahaki; Kia rangona tona ihi, tona wehi, tona tapu; Kia tupu tona mana me tona rangatiratanga; Kia puawai tona waiora me tona hauora i roto i te hono tangaengae o tona wairua me tona tinana ... koianei te kainga ma koutou ko te whanau ...
He kakano i ruia mai i Rangiatea e kore ia e ngaro
Tino motuhake enei ahuatanga katoa. Ko tenei hoki te kakano i ruia mai i Rangiatea. E kore ia e ngaro. Engari, ko ta nga matua, ko ta te whanau, ko ta te kura hoki, he mea awhi, he mea whangai, he mea whakaako i te tamaiti kia tupu ora ai tona katoa i roto i te tika me te maungarongo.
Ko te ngakau te mata me te kuaha o te wairua. Otira, ko te whiu o te kupu, ko te wero, ko te riri, ko te aroha, ko te humarire, me enei ahuatanga katoa he mea kuhu ki te ngakau titi tonu ki te wairua. Koia nei te timatanga o te korero ‘kia ngakau mahaki’. Ma tenei hoki ka tika te korero ‘He oranga ngakau he pikinga waiora’.
Toku reo, toku ohooho, toku reo, toku mapihi maurea, toku reo, toku whakakai marihi ...
He tapu nga reo katoa. No reira, me whai koha te hunga o nga Kura Papa Kainga ki nga reo katoa.
Mo nga tamariki, kia rua nga reo. Ko te reo o nga matua tupuna tuatahi, ko te reo o tauiwi tuarua. Kia orite te pakari o ia reo, kia tu tangata ai nga tamariki i roto i te ao Maori, i roto hoki i te ao o Tauiwi.
Ka pu te ruha, Ka hao te rangatahi
Ko tona ake kainga te ao tuatahi me te kura timatanga o te tamaiti. Tua atu o tenei ko te ao Maori. Ma te Kura Papa Kainga ia e arahi i roto i enei nekeneke tae noa ki tona kura whakamutunga, ara, ki te ao whanui me ona ahuatanga katoa.
Tamariki wawahi taha, Aratakina ki te matapuna O te mohio, o te ora, o te maungarongo
Ko nga ahuatanga ako katoa he mea mahi i roto i te koanga ngakau, me te whakaihiihi hinengaro. He mea whakaihiihi i te tamaiti te noho o te pakeke ki tona taha hei toko mona i roto i ana mahi. Heoi ano, ko te awhi ko te tautoko i a ia. Engari kia kaua e riro ma te pakeke e mahi te mahi a te tamaiti.